Edaria baidari.com

ہم ’’ بیداری ڈاٹ کام ‘‘ میں آپ کو خوش آمدید کہتے ہیں۔ اداریہ میں تھوڑا ’’ بیداری ڈاٹ کام ‘‘ کے منصہ شہود پر لانے کا پیش منظر بیان کرتے ہیں۔
ہر دور میں وقت کی ضرورت کے مطابق کے کردار اور رخ کا تعین کرناقوموں کی بقاء اور اپنی ساخت کو برقرار رکھنے کیلئے ضروری سمجھا جاتا ہے۔یہ اس دنیاکی زندگی کی ایک مسلمہ حقیقت ہے کہ جو قوم دنیا کے بدلتے حالات کے مطابق اپنی ساخت ، اپنی حیثیت کو برقرار رکھنے اور اپنے نصب العین پر قائم رہنے کیلئے کوئی کردار ادا نہیں کرتی ، کوئی تدبیر، کوئی حکمت عملی طے نہیں کرتی کہ وہ جس نظام حیات پر ایمان رکھتے ہیں وہ اسی طرح برقرار رہے ، اس پر اغیار کا رنگ نہ چڑھے تو اس کا صفحہ ہستی سے مٹ جانا ، یا دنیا میں ذلیل و رسواء ہونا بالکل اُسی طرح یقینی ہوتا ہے جس طرح تیل ختم ہو جانے کے بعد چراغ کاگل ہوجانا یقینی ہوتا ہے ۔
گویا دنیا کی بدلتی رنگ رنگینیوں میں خود کو بیدار رکھنا، اپنے نصب العین اور مقصد زندگی سے پیچھے نہ ہٹنا، وقت کے تقاضوں کے مطابق طرز عمل اور رخ کا تعین کرنا چلتی گاڑی میں تیل کا کام کرتا ہے۔ اگر چلتی گاڑی کو بر وقت تیل مہیا ہوتا رہے تو وہ درست سمت اپنی منزل کی طرف چلتی رہے گی۔اگر بر وقت تیل مہیا نہ ہو تو وہ کبھی آپ کو آپ کی منزل کے راستے پر گامزن نہیں رکھ پائے گی۔بلکہ اب منزل کا راستہ چھوڑ کر آپ کو پہلے تیل کی تلاش میں در بدر بھٹکنا پڑے گا۔ در در کی ٹھوکریں کھانا پڑیں گی۔ آج یہی صورت حال پوری ملت اسلامیہ کو در پیش ہے۔آج ہمارے رخ ہماری منزل کی طرف نہیں ہیں۔ہم تیل، قوت یعنی جوش و جذبہ اور مؤثر قیادت کے لئے مارے مارے پھر رہے ہیں۔ نہ کہیں سے ہمیں مطلوبہ قوت و تاثیر مل رہی ہے ، نہ ہمیں ایسی قیادت ہمیں میسر ہے جو ہمیں ہماری منزل کا پتہ دے۔آج ہمیں دنیا کی ہر سہولت میسر ہے، نہ وسائل کی کمی ہے نہ افرادی قوت کی۔ اگر ہم میں کسی چیز کی کمی ہے تو وہ اس جوش، جذبہ اور ولولہ کی ہے جو ابتداء کے مٹھی بھر مسلمانوں میں تھا اور وہ اپنے کردار سے پوری دنیا پر فائق تھے۔ آج دنیا بھر میں مسلمانوں کی تعداد ڈیڑھ ارب سے زائد یعنی دنیا کا ایک چوتھائی ہے ، یعنی دنیا میں مسلمانوں کی اتنی بڑی تعداد موجود ہے جو اس سے پہلے کبھی نہ تھی مگر اس کے باوجود ہر طرف ذلت و رسوائی، خواری و ناداری ہم پر مسلط ہے۔ ہم میں وہ غیرت نہیں رہی، ہمارے ضمیر مردہ ہو چکے بلکہ آج ہماری روحیں بھی مردہ ہی جنم لیتی ہیں۔ جیسے دانائے راز حضرت اقبال علیہ الرحمہ نے فرمایا کہ ’’ مردہ زایند از بطون امہات‘‘ کہ آج بطون امہات سے مردہ روحیں جنم لے رہی ہیں جنہیں کوئی احساس ، کوئی فکر، کوئی تخیل ہی نہیں آتا ہم کبھی ایک عظیم قوم تھے۔ شرق سے غرب ہوا بھی ہمارے اشاروں پر چلتی تھی۔طوفان ہمارے جواں جذبے دیکھ کر اپنے رخ بدل لیا کرتے تھے۔ سمندر کا پانی سخت جان ہو کر ہمارے لئے راستے ہموار کرتا تھا۔ وہ کیا گردوں تھا، وہ کیا قوم تھی جس کے ہم فرزند ہیں ، مگر موجودہ حالات زار دیکھ کر روح کانپ جاتی ہے کہ کیا ہم مردہ زایند اس قوم کے فرزند ہیں؟ ہماری ان سے کیا نسبت ہو سکتی ہے؟ آج کی مردہ روحوں کا ان سے کوئی ادنیٰ سی نسبت استوار کرنا بھی ان کی توہین ہوگی ہم فرزند کی بات کرتے ہیں؟
ہم نے بدلتے حالات کے مطابق خود کو بیدارو ہوشیار نہیں رکھا۔ ہم دنیا کی رنگ رنگینیوں میں پڑتے چلے گئے، اغیار کی ہر سازش ، ہر مکاری کا شکارہوئے مگر اس کے خلاف قوت مضافت پیدا نہیں گی۔ آج ہمارے اندر کے ایمان کمزور ہیں۔مغرب کی مکاری و عیاری اور تہذیب و فلسفہ نے ہمارے ایمان کی جڑوں کو کھوکھلا کر دیا ہے۔ہم صرف نام کے مسلمان رہ گئے ہیں ہمارے کردار ، ہمارے اخلاق، ہمارے اوصاف یہود و نصاریٰ سے بھی گئے گذرے ہیں۔ آج ہم اپنے سارے دینی اصول و ضوابط، ساری اقتدار و روایات کھو کر بہت گہری نیند سو رہے ہیں۔ اگر کسی بہت گہری نیند سوئے آدمی کو زخم لگے یا کوئی کیڑی وغیرہ بھی ڈس لے تو وہ فوراً بیدار و ہوشیار ہو کر اس سے اپنا دفاع کرتا ہے ۔مگر بد نصیب قوم ایسی مدہوش نیند سوئی ہے کہ اتنے بڑے بڑے ٹارچر پہنچے پر بھی قوم میں ذرا جنبش نہیں آئی کہ وہ کروٹ ہی بدل لے۔ جیسے کسی مردہ کو جتنا ٹارچر کیا جائے اس میں ذرا جنبش نہیں آتی بالکل یہی حال ہمارا ہے ۔ ہم غفلت میں پڑے اتنی گہری نیند سورہے ہیں کہ بیداری کا نام تک نہیں لے رہے۔یوں لگتا ہے جیسے ہم بیدار ہونے کیلئے ثور اسرافیل علیہ السلام کے منتظر ہوں کہ ہمیں اگر ثور کی آواز سنائی دے گئی تو ہم اٹھیں گے اس سے پہلے ہم اٹھنے والے نہیں۔
بہت افسوس سے کہنا پڑ رہا ہے کہ ہم مسلمان جس نظام حیات پرایمان رکھتے ہیں وہ اس وقت دنیا میں کہیں نظر نہیں آتا ہے۔ہمارے اوپر ہر طرف اغیار کا رنگ چڑھا ہوا ہے۔صورتیں دیکھو تو مغرب زدہ، لباس دیکھو تو مغرب زدہ، کردار دیکھو تو مغرب زدہ۔اسلام کا توصرف نام رہ گیا ہے مگر اسلام زدہ کوئی ہزاروں میں ایک بھی شازو نادر ہی ملتا ہے۔اس کے سبب آج دنیا میں ہم ذلت و رسوائی، خواری و ناداری آج اپنی آنکھوں سے دیکھ رہے ہیں۔آج دنیا میں جس طرف نظر دوڑاؤ ، ہم مسلمان ہی ذلیل ہو رہے۔آج دنیا میں جتنے مسائل ہیں وہ ہم مسلمانوں سے ہی وابستہ ہیں اور اغیار ظلم و ستم کی تاریخ رقم کر رہے ہیں۔ ہم ظلم و جبر کی چکی میں پس رہے ہیں۔ آج کن کے گھر لوٹے جا رہے ہیں؟ کن کے وسائل پر قبضے ہو رہے ہیں؟ آج چار سو دنیا میں کن کی نسل کشی کی جا رہی ہے؟ آج ہر سو جلی نعشیں، بکھرے لاشے، کٹے اعضاء، بین کرتی مائیں، سسکتی بہنیں، اجڑے سہاگ، بلکتے بے سہارا بچے کس ملت سے وابستہ ہیں؟ آج دنیا میں کونسی قوم ظلم و جبر کی چکی میں پس رہی ہے؟ کیا کبھی کسی نے یہ سوچا؟ کیا یہ سب کچھ دیکھ کے کبھی کسی کا خون کھولا؟ کب بیدار ہو گی یہ سوئی بے جان ملت؟ کب کھولیں گی اس مردہ بے ضمیر قوم کی آنکھیں؟کب بیدار ہو گی یہ مرحوم امت؟
ہر مہذب اور باشعور قوم کا نظامِ حیات اس کے بنیادی عقائد و نظریات ، اقدار و روایات، اصول و ضوابط اور نظریہ حیات کا آہینہ دار ہوتاہے۔ اس لیے اگر آج مسلمانوں میں اسلامی نظامِ حیات رائج نہیں تو ماننا پڑے گا کہ انہوں نے اسلام کو محض زبانی دعوؤں اور ایمان کے کھوکھلے نعروں کے علاوہ اسے ایک دین ، ایک مکمل ضابطہ حیات کی حیثیت سے قبول ہی نہیں کیا، اسے ایک کامل دین اور ایک مکمل نظامِ ہائے زندگی کی حیثیت سے اپنے دل و دماغ میں جگہ ہی نہیں دی ۔ اس کی بجائے جو ضابطہ حیات ہم نے اختیار کیا وہ ہمارے اجتماعی نظام (معاشرت، معیشت، عدل و انصاف، قانون وسیاست) وغیرہ سے صاف ظاہرہے۔اِسے جو چاہے نام دیں مگر یہ ایک اسلامی نظامِ حیات ہرگز نہیں ہے ۔
اس سے بڑی کم بختی اور ہمارے لئے کیا ہو سکتی ہے کہ آج امت کی بیداری و اصلاح کا نعرہ محراب و منبر ، آستانہ و خانقاہوں سے بھی لگانا چھوڑ دیا گیا ہے۔آپ قوم میں بیداری کی سوچ، فکر اور لگن کو پرکھنے کیلئے ملک بھر کی کسی بھی مسجد ، کسی مدرسہ میں چلے جائیں ، ان کی کوششوں کا جائزہ لیں، ان کے فکر و تخیل کو پرکھیں، ان کے بیان و خطاب سنیں تو ان کی ساری قوتیں، ساری صلاحیتیں ، ان کی ساری توانائیاں آپ کو کہیں اور ہی صرف ہوتی نظر آئیں گی۔ وہ سب ملت کی موجودہ صورت حال سے مطمئن نظر آتے ہیں اس لئے اس موضوع پر بات ہی نہیں کرتے۔ امت کی بیداری و اصلاح کی فکر و سوچ، دنیا میں چار سو ذلت و رسوائی کے اسباب میں غور و تدابر ، ملت کا درد، احساس و بے چینی آپ کو کہیں نظر نہیں آئے گی۔آپ علماء کے جمعہ کے خطبات سنیں، مجمع و محافل کے بیانات سنیں آپ کو موضوع سوائے بخشش کے، وسیلہ کے، کرم، رحم و مغفرت، شفاعت و رحمت کے، شخصیات کے فضائل وکرامات اورمقام و مرتبت کے، دنوں اور مہینوں کے فضائل کے، مخصوص ایام کے فضائل سننے کو ملیں گے۔ قوم کو عظیم بنانے کیلئے بیداری و اصلاح، بلندی کردار، پختگی اخلاق، پاکیزگی نفس ، معاشرتی طہارت ، معاشرتی رہن سہن، بھائی چارہ، رواداری، انسانی مساوات، اسلامی اخوت، برداشت، اور خوف خدا کے موضوع آپ کو کہیں بھی سننے کو نہیں ملیں گے۔
اس سے ہٹ کر اگر کوئی موضوع آپ کو سننے کو ملے گا جس میں بڑا جوش اور گرج و للکار بھی ہو گی تو وہ آپس کی محاذ آرائی، عداوت، کینہ، تعصب و عصبیت اور نفرت پھیلانے کے ہوں گے۔سب ایک دوسرے پر تنقید، ایک دوسرے پر کیچڑ اچھالنے، ایک دوسرے کی جڑیں کاٹنے، ٹانگیں کھینچنے میں سر گرم عمل ہیں اور اس کیلئے بڑی صلاحیتیں اور توانائیاں صرف کی جا رہی ہیں۔ سب آپس کی محاذ آرائی اور جنگی حکمت عملی سے خوب شناسا ہیں اور اس طرح کی تدابیر و حکمت عملی میں دنیا میں ان کا کوئی ثانی نہیں ہے۔ اخوت، بھائی چارہ، رواداری، برداشت، مفاہمت و یکجہتی نام کی کوئی چیز ان کے دامن میں نظر نہیں آتی ہے۔۔ کوئی اتحاد، مفاہمت، رواداری ، اخوت و بھائی چارہ کی بات نہیں کرتا۔ہمارے حکمر ان ہیں تو وہ بے غیرتی و بے حسی کی چادر اوڑھ چکے ہیں۔ ان کی مذہبی حممیت اور غیرت دینی دم توڑ چکی ہے ، انہیں دین و ملت کے ساتھ ہونے والی کسی بھی اونچ نیچ پر کوئی دکھ و صدمہ نہیں پہنچتا، ہاں البتہ کرسی اور اقتدار چھن جانے پر بیساختہ چیخ و پکار نکلتی ہے کہ مجھے کیوں نکالا؟ دشمن کو میر صادق اور میر جعفر بہت سستے داموں مل رہے ہیں، جہاں بد دیانت حکومتیں ہوں، کرپٹ انتظامیہ ، بے ضمیر رہنما، جھگڑالو علماء،فسادی ملاں، بے اثر پیر و مشائخ ہوں تو امت کی بیداری و اصلاح بھلا کیسے ممکن ہو سکتی ہے؟
آپ بیداری کے جذبات کو پرکھنے اور دنیا میں ہمارا کھویا ہوا مقام واپس دلانے کی کوششوں کا جائزہ لینے کی غرض سے آستانوں، مزاروں اور خانقاہوں کا رخ کریں تو وہاں ماسوائے اپنی پوجا چاٹ اور تعویذ دھندہ کے کچھ نظر نہیں آئے گا۔صرف ان کی بارگاہ میں آ کرادب سے جھکتے رہو، اپنی خدمات، نذر، نیاز پیش کرتے رہو تو تمہاری جنت پکی اس کیلئے اور کسی عمل کی ضرورت نہیں۔ یہ رہبری ہو رہی ہے امت کی اور فیض بانٹا جا رہا ہے امت میں بد عملی کا۔ ملت کیلئے کچھ کرنے کرانے کی کوئی تدبیر و تحریک ان خانقاہوں سے اٹھے یہ ناممکن نظر آتا ہے۔
آپ بیداری و اصلاح کی سوچ لے کر سکول ، کالج و یونیورسٹیز کا وزٹ کر لیں وہاں سے بھی آپ کی کوئی حوصلہ افزائی نہیں ہونے لگی۔وہاں یہ حال ہے کہ حضرت اقبال علیہ الرحمہ کے بقول ’’ سبق شاہین بچوں کو دے رہے ہیں خاکبازی کا‘‘۔ ان کے مزید کچھ کہنا فضوں تر ہوگا ، آپ نے ہی بہت بڑی بات ارشاد فرما دی۔ تاریخ گواہ ہے کہ ان اداروں سے جو بھی نکلا خاکباز ہی نکلا، شاہین جیسی اڑان بھرنے والے نہیں۔
میں نے بیداری و اصلاح کی سوچ لے کر کتابوں کو کھنگالا، لائبریریوں اور مکتب گاہوں میں جا کر دیکھا کہ شاید کہیں سے کوئی ایسی تحریر، فکر و تدابر ، احساس دلانے اور جوش ابھارنے والی درد ملت سے لبریز و سرشار تحریر مل جائے جو قارئین کو احساس دلائے اور جھنجھوڑ کر رکھ دے،ان میں ملت کی سوچ، ملت کی فکر،ملت کا درد پیدا کرے مگر مجھے کوئی ایسی تحریر نہ مل سکی جو بیداری و اصلاح کے حوالہ سے مؤثر اور کار آمد ثابت ہوتی۔
امت رسول ﷺ کی بیداری و اصلاح کے حوالہ سے علماء کرام اور پیران عظام کے بیانات کو پرکھاتو مجھے کسی کے بیانات میں وقت کے تقاضوں کے مطابق ملت کا درد، احساس اور فکر دیکھنے کو نہیں ملی جوروایتی تقاریر سے ہٹ کر اپنے خطابات میں، جمعہ کے مجمع میں، محافل کے ہجوم، عرسوں، میلوں اور خانقاہوں کے اکٹھ میں امت مرحومہ کی موجودہ حالات زار دیکھ کر روتا ہو، چیلاتا ہو، کردار و اطوار،روایات و اخلاقیات سنورنے کی بات کر تا ہو، اپنا قبلہ، اپنا واضح قطع درست کرنے کی بات کرتا ہو۔ سب میں روایتی تقاریر فضائل ، بخشش، کمالات، مقام و مرتبت اور واقعات دہرانے کے سواء کچھ نظر نہیں پڑا۔ایسی تقاریر سے لوگ واہ واہ تو کرتے ہیں مگر یہ جوش خطابت لوگوں کی کایا نہیں پلٹ سکتی ہے۔ آج کے مسلمان اتنے باکمال نہیں ہیں کہ نرم و نازک گفتار سن کر ، لگی لپٹی اور اشاروں سے سمجھائی گئی بات ادارک کر کے عمل کرنے لگیں۔ نرم و نازک کلام آج کے بدنصیب مسلمانوں پر اثر نہیں کرتا ہے۔اب تو ایسی گفتار کی ضرورت ہے جو ان کے کلیجے ہلا کر رکھ دے، جسے سن کر انسان کے رونگٹے کھڑے ہو جائیں، جو انہیں پوری طرح جھنجھوڑ کر رب کا خوف، ملت کا احساس اور فکر دلائی جائے اور ان میں رسول اللہ ﷺ کی امت کے لئے کچھ کرنے کا جذبہ پیدا کرے۔
بیداری و اصلاح کے حوالہ سے ہر طرف سے مایوس ہو کر میں نے خود قلم اٹھانے کی تھان لی اور الحمد للہ عزوجل! اللہ کریم کی خاص رحمت ہوئی اور حضور نبی کریم ، رؤف الرحیم ﷺ کی شفقت و نظر رحمت شامل حال ہوئی تو میرے قلم سے ایسی تحریر نکلی کہ جس کی نظیر ملنا ناممکن ہے۔ایسا اندازفکر، ایسا جوش، ایسا ولولہ، احساس و دردِ ملت سے لبریز اور فکر انگیز مضامین بہت کم دیکھنے کو ملتے ہیں۔
اس وقت امت جس حال میں ہے اور جس ذلت ، رسوائی ، خواری و نادری کے ایام کاٹ رہی اور اس وقت دنیا میں جو اس کی وقعت اور قدر و منزلت ہے وہ کسی صاحب فکر و نظر سے پوشیدہ نہیں۔ اس وقت دنیا میں مسلمان نہیں مٹی کا ڈھیر ہیں جن کی نہ کوئی وقعت ہے نہ کوئی سمت، نہ کوئی جہت، نہ کوئی منزل، نہ کوئی مقصد حیات،نہ کوئی دستور ، نہ کوئی ضابطہ ، نہ کوئی تاریکیوں سے نکلنے کی سعی و حرکت، نہ کوئی جدو جہد۔دنیا اس بے جان مٹی کے ڈھیر کو اپنے قدموں روند روند کر زمین برابر ہموار کر دینے کے درپے ہے کہ اس مٹی کے ڈھیر کا بھی کوئی نشان باقی نہ رہے۔ ان نازک حالات میں امت کے ایک ایک فرد میں حضور ﷺ کی امت کا احساس ، بیداری کی لگن ، تڑپ اور جوش و ولولہ کا پیدا ہونا وقت کی اشد ضرورت ہے اگر ایسا نہیں ہوتا تو اس سے بڑھ کر اور کوئی بڑی کم بختی نہیں ہو گی امت کی۔
قارئین سے التماس ہے کہ وہ بیداری کی اس سوچ، فکر، لگن اور جذبہ کو ملت کے ہر ہر فرد تک پہنچانے میں ہمارے معاون ثابت ہوں تاکہ ملت میں بیداری و اصلاح کا جذبہ اٹھے اور سوئے ضمیر جاگ اٹھیں۔ہمیں یہ تسلیم کرنے میں قطعاً کوئی عار نہیں ہے کہ اس وقت جس قدر گمراہی و ضلالت، فسق و فجور کی تاریکی چھائی ہے ہم اسے فی الفور رفع تو نہیں کر سکتے، مگر اس کے لئے کوشش تو کر سکتے ہیں۔ ان گھٹا ٹوپ اندھیروں میں کوئی چراغ تو جلا سکتے ہیں اور میں نے بزرگوں سے سنا ہے کہ’’ چراغ چاہے جتنا ہی چھوٹا کیوں نہ ہو، ساری دنیا کا اندھیرا مل کر بھی اسے نہیں بجھا سکتا ہے۔‘‘ تو اس لئے اندھیروں میں ایک چراغ جلانے کا سوچا۔
اور یہ سوچ کر بھی اپنی کوششوں کا آغاز کیا کہ ہم سب مل کر بابائے ملت حضرت سیدنا ابراہیم علیہ السلام کے لئے جلائی گئی آتش نمرود بجھانے کی کوشش کرنے والی اس چڑیا کا سا کردار تو ادا کر سکتے ہیں جو اپنی چھوٹی سی چونچ میں پانی بھر بھر لاتی اور اس آگ کے اتنے بڑے آلاؤ پر ڈالتی تھی کہ شائد بجھ جائے۔ کسی نے چڑیا سے پوچھا ہو گا کہ ’’ اے چڑیا! تو یہ آگ بجھا تو سکتی نہیں مگر یہ چونچ میں پانی لا لا کیا مشق کر رہی ہے۔‘‘
تو یقیناًچڑیا نے یہ جواب دیا ہوگا کہ ’’ مجھے معلوم ہے کہ میں یہ آگ بجھا نہیں سکتی،مگر کل قیامت کے دن جب خدا کی بارگاہ میں بلاوا ہو گا آگ جلانے والوں اورآگ بجھانے والوں کا، تو میرا نام آگ بجھانے کی کوشش کرنے والوں کی فہرست میں تو شامل ہو گا۔‘‘
بس یہ سوچ کر زمانے کو لگی آگ بجھانے کیلئے اپنی سعی و حرکت کا آغاز کیاکہ چلو یہ آگ ہم نہ ہی بجھا سکے مگرخدا کی بارگاہ میں آگے بجھانے کی کوشش کرنے والوں میں نام تو شامل ہو گانا!
ہم تو بیداری کے لئے اذان دے رہے ہیں، ناجانے امامت کون کروائے گا ، پتہ نہیں ہم اس دور میں زندہ ہوں گے بھی یا نہیں۔ مگر اتنا ضرور عرض کرتے ہیں کہ جو بھی اس دور میں زندہ ہو، ان سے گذارش کرتے ہیں کہ خدارا! ہمارے مدفن پہ آ کر یہ خوشخبری ضرور سنا دینا کہ اب رسول اللہ ﷺ کی امت بیدارہو چکی ہے، اس نے اپنا کھویا مقام پھر سے حاصل کر لیا ہے اور اب دنیا میں ایک عظیم مقام رکھتی ہے۔ بس یہ سن کر ہی ہماری بے چین روحوں کو قرار آ جائے گا۔ والسلام
بندہ ناچیز، العبد العاصی
اللہ بخش فریدی
بانی و مدیر
و جملہ ٹیم بیداری ڈاٹ کام

تمام مضامین

401

اجڑے چمن کا نرالہ باغبان

Edaria baidari.com اپریل 25, 2020April 25, 2020 0 تبصرے

نفیر قلم
محمد راحیل معاویہ

مولانا طارق جمیل صاحب بہت بڑے خطیب اور مبلغ و داعی ہیں۔ انہوں نے اپنی ذہانت ، فصاحت ، بلاغت ،علمی ، دینی اور تبلیغی محنت کی وجہ سے پوری دنیا میں اپنا نام کمایا ہے۔ ان کا کمال یہ ہے کہ انہوں نے اس پرفتن دور میں فرقہ واریت جیسے مہلک مرض سے خود کو بچائے رکھا ہے۔ مسلکی ، گروہی اور فرقہ پرستی کی وجہ سے خود کو کبھی متنازع نہیں بننے دیا۔
ہمیشہ اعتدال کا رستہ اپناتے ہوئے لوگوں میں محبت بانٹی اور انہیں آپس میں توڑنے کی بجائے پیار ،محبت امن، اور سکون سے رہنے کی تلقین کی جس کی وجہ سے وہ ہر طبقہ فکر اور عوام الناس میں اپنا ایک منفرد مقام رکھتے ہیں۔
مولانا کے بے داغ ماضی اور شاندار کردار کی وجہ سے یہ سوال پوری قوت سے ابھرتا ہے کہ مولانا اس قدر محتاط ہونے کے باوجود تمیز و تہذیب سے خالی اور اخلاقی گراوٹ کی بہتی سیاسی گنگا میں خود کو آلودہ کرنے کی سنگین لاپرواہی کیوں کررہے ہیں ؟
مولانا اکثر بیان میں فرمایا کرتے تھے کہ حکمران قوم کی اعمال کا نتیجہ ہوتے ہیں، عوام نیک و کار و پارسا ہو تو حکمران نیک سیرت جبکہ عوام چور اور کرپٹ ہو تو حکمران بھی انہی جیسے ہوتے ہیں۔
گذشتہ دنوں مولانا نے فرمایا کہ ہماری قوم نہایت جھوٹی، بدکردار اور بد دیانت ہے جبکہ اس جھوٹی ، چور اور کرپٹ قوم کا سربراہ اکیلا دیانت دار ،سچا اور مخلص آدمی ہے۔میں اس دن سے انگشت بداں سوچنے پر مجبور ہوں کہ چور و بددیانت قوم کا سربراہ ایماندار اور سچا کیسے ہوسکتا ہے ؟
مولانا کو یا تو اس قوم کے بارے میں غلط فہمی ہو گئی ہے یا پھر اس کے سربراہ کے بارے میں۔
نیز مولانا نے فرمایا کہ بیچارہ سچا مخلص اور ایماندار آدمی اس اجڑے ہوئے چمن کو کہاں تک آباد کرے۔
مولانا سے یہ سوال ہے کہ خان صاحب کے نزدیک تو سب سے عظیم اور بڑا لیڈر ہونے کے لیے ہر ہر وعدے سے مکرنا اور اپنے موقف و بیانات سے یو ٹرن لینا ہے، کیا مولانا کے پاس بھی قیادت کو پرکھنے کے لیے یہی کسوٹی ہے ؟
اور بصد احترام عرض ہے کہ اجڑے ہوئے چمن کی ایماندار نیک و کار اور مخلص باغبان ملنے سے پہلے شرح نمو 6•6 فیصد تھی جبکہ اب 1.5 فیصد ہے۔
اجڑے چمن میں شرح سود 5 فیصد تھی جبکہ چمن کے نرالے باغبان نے آکر 13 فیصد تک پہنچادی تھی جو کہ اب کورونا وائرس کی وجہ سے کچھ کم کردی گئی ہے۔
اجڑے چمن میں 53000 ایڈیکس پر پہنچی سٹاک مارکیٹ کو چمن کے سب سے بڑے خیر اندیش نے 35000 سے آگے نہیں بڑھنے دیا۔
اجڑے چمن میں مہنگائی کی شرح 5.5 فیصد تھی جبکہ ملک و قوم کے سب سے بڑے خیر خواہ نے 16فیصد پر لا کھڑی کی ہے، جس میں بدستور اضافہ جاری ہے اور چمن کے باشندوں کی چیخیں آسمان تک سنائی دے رہی ہیں۔
اجڑے ہوئے چمن میں 58 ارب ڈالر سے سی پیک کے منصوبے شروع کیے گئے،بیرونی سرمایہ کاری 5700 ملین تھی مگر چمن کو آباد کرنے والوں نے سرمایہ کار کو پکڑنے ،گھسیٹنے ، ذلیل کرنے اور احتساب کے نام پر ایسا خوف دلایا کہ بیرونی سرمایہ کاری 2500 ملین تک سکڑ گئی اور چمن کے باغبان کو سو سو ڈالر کے لیے ہاتھ پھیلانے پڑے۔
اجڑے چمن نے اس چمن کو اتنا اجاڑا چمن 5 ارب روپے یومیہ مقروض ہوتا رہا، مگر قربان جائیے اس باغبان پر کہ جس نے اس چمن کو پومیہ 21 ارب روپے کا مقروض کیا۔
اجڑے چمن میں چین سے نہایت آسان شرائط پر قرضے حاصل کیے گئے، ان قرضوں میں سے 2021 تک ایک روپیہ بھی واپس نہیں کرنا مگر چمن سنوارنے کے لیے ہم نے ایسے باوفا دوست کے منصوبوں کو لات ماری اور 6 ارب ڈالر کے لیے دوبارہ آئی ایم ایف کے پاس جا بیٹھے۔
اجڑے چمن میں امیروں کے ساتھ ساتھ کچھ سبسڈیز غریبوں کو بھی مل جاتی تھیں مگر اس چمن کو سنوارنے کے لیے ان غریبوں سے میٹرو بس تک کی سبسڈیز چھین لی گئیں مگر جہانگیر ترین اور خسرو بختیار جیسے شوگر مافیاز کو اربوں روپے کی سبسڈیز دی گئیں۔ اہل چمن نے35 روپے فی کلو مہنگی چینی بھی انہی سبسڈیز کھانے والوں سے خریدی اور اپنی حلق کے نوالے تک باغبانان چمن کے حوالے کردیے۔
اجڑے چمن میں 52 ڈالر فی بیرل ملنے والا تیل 70 روپے فی لیٹر فروخت ہوتا رہا اور اسد عمر جیسے ماہر معاشیات کیلکولیٹر لے کر بتاتے رہے کہ اس میں سے 40 روپے فی لیٹر نواز شریف کی جیب میں جاتے ہیں مگر اب یہ تیل عالمی منڈی میں منفی حدتک گر گیا لیکن قوم کو 97 روپے لیٹر فروخت ہوتا رہا اور یہ پتا نا چل سکا کہ اب یہ پیسے کس کی جیب میں جارہے ہیں۔
اجڑے چمن میں سن 2018 کے اندر غربت کا تناست 31 فیصد تھا مگر اب یہ 45 فیصد تک پہنچ گیا ہے جس میں مزید تیزی سے اضافہ ہوتا جارہا ہے ۔
اجڑے چمن میں خط غربت کی لکیر کے نیچے زندگی گزارنے والوں تعداد 7 کروڑ تھی اور اس ہرے بھرے آباد چمن میں 9 کروڑ کو پہنچ چکی ہے۔
اجڑے چمن میں کئی صاحب نصاب افراد کہ جن پر زکوة فرض تھی وہ اس آباد چمن میں مستحقین زکوة ہیں۔
بقول شاعر
میں اس گلشن کا بلبل ہوں بہار آنے نہیں پاتی
کہ صیاد آن کر میرا گلستاں مول لیتے ہیں
محمد راحیل معاویہ نارووال